Geguritan bahasa jawa

-->

Mulih Desa

Wong mulih saka paran.

Deres dadi banyu grojogan.

Ora kendhat,

Senadyan tengah gemontang,

Wengi kliwat,

Nalika sliranmu isih kotos-kotos gemrobyos,

Nggremet ing kuthamu,

Dumadakan krasa kebentus watu,

Sisa sajuwing lemah tinggalane simbah,

Wis kebancut ditancapi pondasi omah,

                Ora susah ditangisi,

Ing kutha wong murka tambah ngambra-ngambra,

Ing kene apa bedane,

Wong mulih saka paran,

Gage-gage njembreng klasa kanggo jegongan,

Ora perlu ditangisi, wong setaun pisan lagi bali.

Wonogiri 2007

Sengkuni Mbayi

Dening: Setyawati dwi H.

Padha lan prasaja lan ati-ati,

Nyawang rupa, wujuding klambi,

Lah sengkuni siki mbayi,

Mbabar pianak neng endi-endi

Watenge mapan sadhengah panggonan

Tuwuh nrembaka nyebar anakan

Saka desa kutha rumata

Wiwit nata natas kawula

Ora mung wujud santri lan siswa

Pandhita kyai akeh kang kena,

Watak sengkuni ndasaring pokil

Seneng usil jail methakil

Obong-obong adu-adu,

Ngakali rembug ngicih keliru,

Dina-dina mung ngumpah-ngumpah,

Dudang-duding jare kabeh salah

Sewayah-wayah mung petan pinjalne liyan,

Jebul melik ndamping krajan